Хрыстос прызямліўся ў Гародні

1. Упершыню на беларускай мове: Караткевіч У. Хрыстос прызямліўся ў Гародні. — Мн.: Маст. літ., 1972.

2. Рукапіс рамана невядомы.

3. Машынапісы рамана захоўваюцца ў аддзеле рэдкіх кніг і рукапісаў Цэнтральнай навуковай бібліятэкі імя Якуба Коласа Нацыянальнай акадэміі навук Рэспублікі Беларусь, Ф. 11, воп. 1, адз. зах. 41 — 47, з пералікам у пачатку твора герояў і іх характарыстыкай, што адсутнічае ў кніжных выданнях рамана, а таксама паметай у канцы: 7 красавіка 1965 г. — 29 красавіка 1966 г. Чалябінск (Шагол) — Рагачоў.

4. Там жа, адз. зах. 48, захоўваюцца накіды да рамана, дзе пададзены нумарацыя і назвы раздзелаў, названы героі і дадзена ім характарыстыка, прыводзяцца эпіграфы да раздзелаў, намаляваны план старажытнай Гародні. Знешні выгляд Юрася Братчыка, напрыклад, апісваецца так: «Залаціст.[ыя] валасы, твар нейкі смешны, густ.[ыя] бровы, вочы ненатуральна вялікія і празрыстыя, аблічча мятае. З вачэй нешта нібыта льецца, падпарадк.[оўвае? оўваючы?], робячы чал.[авека] дабрэйшым. У машынапісе, адз. зах. 41, галоўны герой характарызуецца наступным чынам: »Юрась Братчык з П’янага Двара, ён да Хрыстос. Шкаляр-недавучка, за дабрыню і сумненні ў веры выгнаны з Мірскага калегіюма«.

5. Выходзіў у аўтарызаваным перакладзе Навума Кісліка на рускай мове («Неман», 1966, № 11 — 12). Перакладзены на чэшскую і ўкраінскую мову.

6. На кінастудыі «Беларусьфільм» створаны ў 1967 годзе паводле рамана аднайменны фільм.

7. Набор зроблены па выданні: Караткевіч У. Збор твораў: У 8 т. Т. 6. Хрыстос прызямліўся ў Гародні: Раман. — Мн.: Маст. літ., 1990.