З запісных кніжак — 1960

Дзіця чалавечае

Маленькая дзяўчынка заснула ў лесе:

Ружовыя ручкі на мяккім зялёным імху.

Вакол салатныя крыжыкі заечай капусты

І глянцавіта зялёны, падкоўкамі,

падалешнік

Дзяўчынка спіць на жывоціку. І мне,

як малому, здаецца,

Што дзяцей сапраўды знаходзяць

заўсёды ў капусце,

Ў зялёнай заечай капусце, ў вячэрнім

дрымотным бары.

Дзяўчынка спіць. Ёй сняцца

гасцінныя жывыя мядзведзі.

Стаяць вакол добрыя лясныя волаты.

У шатах прысмерак. Ружовыя вячэрнія

цені.

Хай ёй будзе абаронай самая кволасць,

Самая безабароннасць чалавечага дзіцяці.

Яндекс.Метрика